തൃശ്ശൂർ വെള്ളാങ്കല്ലൂരിൽ ഗ്യാസ് സിലിണ്ടർ പൊട്ടിത്തെറി: പൊള്ളലേറ്റ വീട്ടമ്മ മരിച്ചു, ഭർത്താവിന് ഗുരുതര പരിക്ക്.
തൃശ്ശൂർ, വെള്ളാങ്കല്ലൂർ: വെള്ളാങ്കല്ലൂർ എരുമത്തടം സ്വദേശി രവീന്ദ്രന്റെ ഭാര്യ ജയശ്രീ (60) വീട്ടിലുണ്ടായ ഗ്യാസ് സിലിണ്ടർ പൊട്ടിത്തെറിയിൽ പൊള്ളലേറ്റ് ചികിത്സയിലിരിക്കെ മരിച്ചു. ഇന്നലെ (ജൂലൈ 8, 2025) ഉച്ചയ്ക്ക് 2 മണിയോടെയായിരുന്നു അപകടം.
ചേർപ്പിലെ ബന്ധുവീട്ടിൽ പിറന്നാൾ ആഘോഷം കഴിഞ്ഞ് മടങ്ങിയെത്തിയ രവീന്ദ്രനും (70) ഭാര്യ ജയശ്രീയും വീട്ടിൽ കയറി ലൈറ്റ് ഓൺ ചെയ്തപ്പോൾ പൊട്ടിത്തെറിയുണ്ടാവുകയായിരുന്നു. വീടിനകത്ത് ഗ്യാസ് ലീക്കായി നിറഞ്ഞിരുന്നതാണ് പൊട്ടിത്തെറിക്ക് കാരണമെന്ന് കരുതുന്നു. വീടിന്റെ മുൻവശത്തെ ഇരുമ്പ് വാതിൽ അടക്കം തകരുകയും എല്ലാ മുറികളിലും തീ പടരുകയും ചെയ്തു.
ഗുരുതരമായി പൊള്ളലേറ്റ ജയശ്രീ തൃശ്ശൂരിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് മരണപ്പെട്ടത്. സാരമായി പൊള്ളലേറ്റ ഭർത്താവ് രവീന്ദ്രൻ എറണാകുളത്തെ ആശുപത്രിയിൽ ചികിത്സയിലാണ്.
