ചാലിശ്ശേരി:ഇന്ത്യയിലെ ഗ്രാമീണ സ്ത്രീ സംരംഭകരുടെ ഏറ്റവും വലിയ വ്യാപാരോത്സവമായ കുടുംബശ്രീ ദേശീയ സരസ് മേളയ്ക്ക് 2026 ജനുവരി 2 മുതൽ 11 വരെ പാലക്കാട് ജില്ലയിലെ തൃത്താല നിയോജക മണ്ഡലത്തിലെ ചാലിശ്ശേരി വേദിയാവും.
തദ്ദേശസ്വയംഭരണ വകുപ്പിന് കീഴിലുള്ള കുടുംബശ്രീ മിഷൻ കേരളത്തിൽ സംഘടിപ്പിക്കുന്ന പതിമൂന്നാമത് ദേശീയ സരസ് മേളയാണ് ചരിത്രത്തിലാദ്യമായി തൃത്താലയിൽ നടക്കുന്നത്.
മേളയുടെ പ്രചരണത്തിന്റെ ഭാഗമായി ഡിസംബർ 30 ന് ചൊവ്വാഴ്ച രാവിലെ 7 മണിക്ക് തൃത്താല കൂട്ടുപാത മുതൽ ചാലിശ്ശേരി വരെ മിനി മാരത്തോൺ സംഘടിപ്പിക്കും.
റൺ ഫോർ യൂണിറ്റി, ഡൈവേഴ്സിറ്റി ആൻഡ് ഫ്രറ്റേർണിറ്റി” എന്ന സന്ദേശം ഉയർത്തിപ്പിടിച്ചാണ് മാരത്തോൺ നടത്തുന്നത്.
ഷൊർണൂർ എം.എൽ.എ പി. മമ്മിക്കുട്ടി മാരത്തോൺ ഫ്ലാഗ് ഓഫ് ചെയ്യും. സന്തോഷ് ട്രോഫി താരം മുഹമ്മദ് നിയാസ്, പാരാ ഫുട്ബാൾ 2025 ഉജ്ജ്വല ബാല്യം പുരസ്കാര ജേതാവ് ലെനിൻ ചാലിശ്ശേരി എന്നിവർ മാരത്തോണിൽ പങ്കെടുക്കും.
മാരത്തോൺ വിജയികൾക്ക് ഒന്നാം സമ്മാനമായി 10,000 രൂപ, രണ്ടാം സമ്മാനം 5,000 രൂപ, മൂന്നാം സമ്മാനം 3,000 രൂപ എന്നിങ്ങനെ ക്യാഷ് പ്രൈസ് നൽകും.
കേരളത്തിലെയും ഇതര സംസ്ഥാനങ്ങളിലെയും രുചിവൈവിധ്യം അവതരിപ്പിക്കുന്ന 30ലധികം സ്റ്റാളുകൾ അടങ്ങുന്ന മെഗാ ഇന്ത്യൻ ഫുഡ്കോർട്ട്, പ്രശസ്ത കലാകാരന്മാർ അണിനിരക്കുന്ന സംഗീത–നൃത്ത നിശകൾ, പ്രാദേശിക കലാകാരന്മാരുടെയും കുടുംബശ്രീ അംഗങ്ങളുടെയും വൈവിധ്യമാർന്ന കലാവിഷ്കാരങ്ങൾ, തൃത്താല മണ്ഡലത്തിലെ പ്രഗത്ഭ വ്യക്തിത്വങ്ങളെ ആദരിക്കുന്ന ആദരസന്ധ്യകൾ, വിവിധ വിഷയങ്ങളിലെ സെമിനാറുകൾ, പുഷ്പമേള, ഹാപ്പിനെസ് കോർണർ തുടങ്ങിയവ മേളയുടെ ഭാഗമായി ഒരുക്കിയിട്ടുണ്ട്.
കൂടാതെ 250 പ്രദർശന-വിപണന സ്റ്റാളുകളിൽ കരകൗശല വസ്തുക്കൾ, ആഭരണങ്ങൾ, തുണിത്തരങ്ങൾ, ഗൃഹോപകരണങ്ങൾ, നിത്യോപയോഗ സാധനങ്ങൾ ഉൾപ്പെടെയുള്ള വിവിധ ഉൽപ്പന്നങ്ങളുടെ പ്രദർശനവും വിൽപ്പനയും നടക്കും.
