ദേശീയ സരസ് മേളയുടെ കൂപ്പൺ കളക്ഷൻ തുക മന്ത്രിക്ക് കൈമാറി
ജനുവരി രണ്ടു മുതൽ 11 വരെ ചാലിശ്ശേരിയിൽ നടക്കുന്ന ദേശീയ സരസ് മേളയുടെ ഭാഗമായി ഏർപ്പെടുത്തിയ സമ്മാന കൂപ്പണിൻ്റെ കളക്ഷൻ തുക തദ്ദേശ സ്വയംഭരണ എക്സൈസ് പാർലിമെൻ്ററി കാര്യ വകുപ്പ് മന്ത്രി എം ബി രാജേഷിന് കുടുംബശ്രീ ജില്ലാ മിഷൻ കോർഡിനേറ്റർ പി ഉണ്ണികൃഷ്ണൻ
കൈമാറി. കൂപ്പൺ കളക്ഷൻ്റെ ആദ്യ ഗഡുവായ 72 ലക്ഷം രൂപയാണ് മന്ത്രിയ്ക്ക് കൈമാറിയത്.
കുടുംബശ്രീയും കേന്ദ്ര ഗ്രാമവികസന മന്ത്രാലയവും സംയുക്തമായി ചാലിശ്ശേരി മുലയംപറമ്പ് മൈതാനിയിൽ പത്തു ദിവസങ്ങളിലായി ദേശീയ സരസ് മേള സംഘടിപ്പിക്കുന്നത്.കേരളത്തിലേയും ഇതര സംസ്ഥാനങ്ങളിലെയും രുചിവൈവിധ്യം വിളമ്പുന്ന മെഗാ ഇന്ത്യൻ ഫുഡ്കോർട്ട്, പ്രശസ്തരായ കലാകാരന്മാരും കലാകാരികളും അണിനിരക്കുന്ന സംഗീത നൃത്തനിശകൾ, പ്രാദേശിക കലാകാരന്മാരുടേയും കലാകാരികളുടേയും കുടുംബശ്രീ അംഗങ്ങളുടെയും വൈവിധ്യമാർന്ന കലാവിഷ്ക്കാരങ്ങൾ, തൃത്താല മണ്ഡലത്തിലെ പ്രഗത്ഭ വ്യക്തിത്വങ്ങളെ ആദരിക്കുന്ന ആദരസന്ധ്യകൾ, വിവിധ വിഷയങ്ങളിൽ സെമിനാറുകൾ, പുഷ്പമേള, ഹാപ്പിനെസ് കോർണർ തുടങ്ങിയവയെല്ലാം മേളയിൽ ഉൾക്കൊള്ളിച്ചിട്ടുണ്ട്.
കളക്ട്രേററിൽ നടന്ന പരിപാടിയിൽ അസിസ്റ്റന്റ് ജില്ലാ മിഷൻ കോർഡിനേറ്റർ എസ് അനുരാധ, കുടുംബശ്രീ ജില്ലാ മിഷൻ പ്രവർത്തകർ തുടങ്ങിയവർ പങ്കെടുത്തു.
