വൈകുന്നേരം 3.30 മുതൽ അഞ്ഞൂർ, കമ്പനിപ്പടി, ചിറ്റഞ്ഞൂർ, തെക്കേപ്പുറം, ചെറുവത്താനി, അഞ്ഞൂർകുന്ന്, തൊഴിയൂർ, നമ്പീശൻപടി എന്നീ ദേശങ്ങളിൽ നിന്നുള്ള പൂരങ്ങൾ പാർക്കാടി പാടത്ത് അണിനിരക്കും.
വൈകുന്നേരം 5.45-ന് നടക്കുന്ന പൂരത്തിലെ പ്രധാന ആകർഷണമായ കൂട്ടിയെഴുന്നള്ളിപ്പിൽ പാമ്പാടി രാജൻ, പുതുപ്പള്ളി കേശവൻ, തിരുവമ്പാടി ചന്ദ്രശേഖരൻ, ചെർപ്പുളശ്ശേരി അനന്ത പത്മനാഭൻ, പുതുപ്പള്ളി സാധു തുടങ്ങി അമ്പതോളം പ്രശസ്തരായ ആനകൾ അണിനിരക്കും. പാണ്ടിമേളത്തിന്റെ അകമ്പടിയോടെയാകും ഈ ചടങ്ങ്.
രാത്രി 9 മണിക്ക് അഞ്ഞൂർകുന്ന് യുവജന ബാലസംഘത്തിന്റെ ആഭിമുഖ്യത്തിൽ നടപ്പുരമേളം അരങ്ങേറും. പാറമേക്കാവ് അഭിഷേകിന്റെ നേതൃത്വത്തിൽ 101-ൽ പരം കലാകാരന്മാർ ഇതിൽ അണിനിരക്കും.
തിങ്കളാഴ്ച പുലർച്ചെ 2.30-ന് ദേവസ്വം പൂരമുൾപ്പെടെയുള്ളവ വീണ്ടും എഴുന്നള്ളിക്കും. 4.30-ന് നടക്കുന്ന കൂട്ടിയെഴുന്നള്ളിപ്പിന് ശേഷം ക്ഷേത്രം കോമരം രാജേഷ് കുട്ടൻഞ്ചേരിയുടെ കാർമ്മികത്വത്തിൽ നടക്കുന്ന 'പൊങ്ങിലിടി' എന്ന പ്രധാന ചടങ്ങോടുകൂടി ഈ വർഷത്തെ പൂരത്തിന് സമാപനമാകും.
