*സവാള കിലോക്ക് 70 രൂപ, വെളുത്തുള്ളി 380, മുരിങ്ങക്കായ 500 രൂപ; സംസ്ഥാനത്ത് പച്ചക്കറി വിലയില്‍ വൻ വര്‍ദ്ധനവ്*
സംസ്ഥാനത്ത് പച്ചക്കറിക്ക് തീ വില. വലിയ തോതിലുള്ള വർദ്ധനയാണ് കഴിഞ്ഞ കുറച്ചു ദിവസങ്ങളിലായി പച്ചക്കറി വിലയില്‍ ഉണ്ടായിട്ടുള്ളത്.
ഇതേ രീതിയാണ് തുടരുന്നത് എങ്കില്‍ വരും ദിവസങ്ങളിലും പച്ചക്കറി വില വർദ്ധിക്കാൻ തന്നെയാണ് സാധ്യത എന്നാണ് കച്ചവടക്കാരും അഭിപ്രായപ്പെടുന്നത്.
പൊള്ളുന്ന വിലയാണ് ഓരോ പച്ചക്കറികള്‍ക്കും മാർക്കറ്റുകളില്‍ ഉള്ളത്. ഏറ്റവും കൂടുതല്‍ വിലവർധന ബാധിച്ചിരിക്കുന്നത് മുരിങ്ങക്കായയെ ആണ്. നിലവില്‍ ഹോള്‍സെയില്‍ വില തന്നെ 480 രൂപയുള്ള മുരിങ്ങക്കായയ്ക്ക് നേരത്തെ 500 രൂപ വരെ വില വർധിച്ചിരുന്നു. തമിഴ്നാട്ടില്‍ വ്യാപകമായി പെയ്ത മഴ പച്ചക്കറി കൃഷിയെ വലിയ രീതിയില്‍ ബാധിച്ചതാണ് വിലവർധനവിന് കാരണമായത് എന്നാണ് വ്യാപാരികള്‍ പറയുന്നത്.
ഒരു കിലോ സവാളയുടെ വില 70 മുതല്‍ 75 രൂപ വരെയും ഒരു കിലോ ബീറ്റ്റൂട്ട് വില കിലോ 80 രൂപയിലും എത്തിയിട്ടുണ്ട്. ഇതുകൂടാതെ ക്യാരറ്റ്, വെണ്ട, തക്കാളി തുടങ്ങിയവയ്ക്കും വലിയ രീതിയില്‍ വില വർദ്ധിച്ചിട്ടുണ്ട്. ക്യാരറ്റ് കിലോക്ക് 90 രൂപയും വെളുത്തുള്ളി കിലോയ്ക്ക് 380 രൂപയും ആണ് നിലവില്‍ ഉള്ളത്. കിലോക്ക് 60 മുതല്‍ 70 രൂപ വരെയാണ് നേന്ത്രപ്പഴത്തിന്റെ വില.
