വയലി മഴോത്സവം 2025 ൻ്റ വിളംബരത്തിന്റെ ഭാഗമായി ആറങ്ങോട്ടുകര വയലരങ്ങിൽ "മഴയും സംഗീതവും" പ്രമേയമായ കലാപരിപാടികൾ അരങ്ങേറി. പ്രശസ്‌ത ഖവാലി, ഹിന്ദുസ്ഥാനി ഗായിക നിസി അസീസി ചടങ്ങ് ഉദ്‌ഘാടനം ചെയ്തു. വയലി മുള സംഗീത ഗ്രൂപ്പിലെ അംഗങ്ങളും നിസി അസീസിയും ചേർന്ന് മഴപ്രമേയമായ പാട്ടുകളുടെ അവതരണവും നടന്നു. തിരുമിറ്റക്കോട് ടീം നൂപുര ചിട്ടപ്പെടുത്തിയ സംഘനൃത്തവും കാണികളെ ആകർഷിച്ചു. വിമയുടെ ഭാഗമായ പ്രാദേശിക ഗായകരുടെ മഴ കവിതകളും, പാട്ടുകളും പരിപാടിക്ക് മിഴിവേകി. ആഗസ്റ്റ് 9,10 ദിവസങ്ങളിൽ നിളയോരത്ത്‌ മഴോത്സവം സീസൺ 9ന് സമാപനം കുറിക്കും. അതിന്റെ മുന്നോടിയായി ജൂലൈ 13ന് മഴയും സിനിമയും, ജൂലൈ 27ന് മഴയും മലയാള സാഹിത്യവും പ്രമേയമായ പരിപാടികൾ മഴോത്സവം വിളംബരങ്ങളുടെ ഭാഗമായി ആറങ്ങോട്ടുകര വയലരങ്ങിൽ അരങ്ങേറും. ജൂലൈ 19,20 ദിവസങ്ങളിൽ കൊല്ലങ്കോട്ടേക്ക് മഴയാത്രയും മഴോത്സവം 2025 ന്റെ ഭാഗമായി സംഘടിപ്പിക്കും. കാലവർഷം ചിട്ടപ്പെടുത്തിയ മലയാളിയുടെ ജീവിത ക്രമങ്ങളെ ഇന്നിന്റെ നേർകാഴ്ചകളുമായി ചേർത്തുവായിക്കുന്നതിനാണ് 2017 മുതൽ വയലി ഭാരതപ്പുഴയുടെ തീരങ്ങളിൽ മഴോത്സവങ്ങൾ സംഘടിപ്പിച്ചുവരുന്നത്. വിനോദ് വയലി, സുധീപ് കടുകശ്ശേരി, വിശ്വനാഥ്, കുട്ടൻ ആറങ്ങോട്, മനോ വയലി എന്നിവർ പരിപാടിക്ക് നേതൃത്വം നൽകി.
