കുന്നംകുളം: കേച്ചേരിയിൽ വൻ കള്ളനോട്ട് വേട്ട; 40000 ത്തോളം രൂപയുടെ കള്ളനോട്ട് കുന്നംകുളം പോലീസ് പിടികൂടി. കേച്ചേരി സ്വദേശി പുതുവീട്ടിൽ 31 വയസ്സുള്ള ജാബിറിന്റെ വീട്ടിലെ കിടപ്പുമുറിയിൽ നിന്നാണ് പോലീസ് പണം പിടികൂടിയത്. എ ഫോർ ഷീറ്റിൽ നിന്ന് നൂറിന്റെയും ഇരുനൂറിന്റെയും അഞ്ഞൂറിന്റെയും നോട്ടുകൾ പ്രിൻറ് എടുത്ത് സൂക്ഷിച്ച നിലയിലാണ് കണ്ടെത്തിയത്. ഇന്നലെ ജാബിറിന്റെ ബന്ധു പെട്രോൾ അടിക്കാനായി പെട്രോൾ പമ്പിൽ കള്ളനോട്ട് നൽകിയിരുന്നു. കള്ളനോട്ട് ആണെന്ന് തിരിച്ചറിഞ്ഞതോടെ പെട്രോൾ പമ്പിലെ ജീവനക്കാരി കള്ളനോട്ട് ആണെന്ന് പറയുകയും ഈ സമയം ഈ പണം പിടിച്ചുവാങ്ങി ജാബിറിന്റെ ബന്ധു രക്ഷപ്പെടുകയും ചെയ്തു. എന്നാൽ പെട്രോൾ പമ്പിലെ ജീവനക്കാരി വാഹനത്തിന്റെ ഫോട്ടോ എടുത്ത് പോലീസിന് കൈമാറി. തുടർന്ന് പോലീസ് നടത്തിയ പരിശോധനയിലാണ് കള്ളനോട്ട് പിടികൂടിയത്. വിദേശത്ത് ഡ്രൈവറായി ജോലി ചെയ്തു വരികയായിരുന്ന ജാബിർ ആറുമാസം മുമ്പാണ് നാട്ടിൽ ജോലി ഉപേക്ഷിച്ച് എത്തിയത്. സംഭവത്തിൽ ജാബിറിനെ പിടികൂടാനായിട്ടില്ല.
