തദ്ദേശസ്വയംഭരണ സ്ഥാപനങ്ങളിലേക്കുള്ള പൊതുതിരഞ്ഞെടുപ്പിനായി ജില്ലയില്‍ സജ്ജീകരിക്കുന്നത് ആകെ 3054 പോളിങ് ബൂത്തുകള്‍. നീതിയുക്തവും സുതാര്യവുമായ തിരഞ്ഞെടുപ്പ് പ്രക്രിയ ഉറപ്പാക്കുന്നതിന്റെ ഭാഗമായി വിപുലമായ ക്രമീകരണങ്ങളാണ് ജില്ലാ തിരഞ്ഞെടുപ്പ് വിഭാഗം ഒരുക്കുന്നത്. ഓരോ പോളിങ് ബൂത്തിലും പരമാവധി 1300 വോട്ടര്‍മാരെയാണ് ഉള്‍പ്പെടുത്തിയിരിക്കുന്നത്. ഒരു പോളിങ് ബൂത്തിന് കുറഞ്ഞത് 20 ചതുരശ്ര മീറ്റര്‍ വിസ്തീര്‍ണ്ണം ഉറപ്പാക്കും. കൂടാതെ, ഓരോ വാര്‍ഡിന്റെയും പരിധിയ്ക്കുള്ളില്‍ത്തന്നെ അതിന്റെ പോളിങ് സ്റ്റേഷന്‍ സ്ഥിതി ചെയ്യും. പഞ്ചായത്തുകളിലാകെ 2749 പോളിങ് ബൂത്തുകളും നഗരസഭകളില്‍ 305 പോളിങ് സ്റ്റേഷനുകളുമാണ് ജില്ലയില്‍ ഉണ്ടാവുക.
തിരഞ്ഞെടുപ്പില്‍ എല്ലാവര്‍ക്കും പങ്കാളികളാകാന്‍ കഴിയുന്ന വിധത്തില്‍ ഭിന്നശേഷി സൗഹൃദമായ അടിസ്ഥാന സൗകര്യങ്ങള്‍ ഓരോ പോളിങ് സ്റ്റേഷനിലും ഉറപ്പാക്കും. ഭിന്നശേഷിക്കാര്‍ക്കും പ്രായമായവര്‍ക്കും എത്തിച്ചേരാന്‍ സൗകര്യപ്രദമായ റാംപ് നിര്‍ബന്ധമാണ്. ആവശ്യത്തിന് ടോയ്‌ലെറ്റ്, വോട്ടര്‍മാര്‍ക്ക് ആവശ്യമായ കുടിവെള്ളം, തടസ്സമില്ലാത്ത വൈദ്യുതി ബന്ധം, പോളിങ് സ്റ്റേഷനുകളിലേക്ക് ഉദ്യോഗസ്ഥര്‍ക്ക് എത്തുന്നതിന് ആവശ്യമായ യാത്രാ സൗകര്യങ്ങള്‍ എന്നിവയും ഉറപ്പാക്കിയിട്ടുണ്ട്.
ജില്ലയിലെ മൊത്തം വോട്ടര്‍മാരുടെ എണ്ണം 24.3 ലക്ഷമാണ്. മൊത്തം 24,33,379 വോട്ടര്‍മാരില്‍ 11,51,556 പുരുഷന്‍മാരും 12,81,800 സ്ത്രീകളും 23 ട്രാന്‍സ്‌ജെന്‍ഡേഴ്‌സും ഉള്‍പ്പെടുന്നു. ഇതിനു പുറമെ, പ്രവാസി വോട്ടര്‍പട്ടികയില്‍ 87 വോട്ടര്‍മാരുമുണ്ട്. സ്ത്രീ വോട്ടര്‍മാരാണ് ജില്ലയില്‍ ഭൂരിപക്ഷം.
