ചങ്ങരംകുളം:വർദ്ധിച്ചുവരുന്ന പകർച്ചവ്യാധി ഭീഷണികൾക്കെതിരെ സമൂഹത്തെ സജ്ജമാക്കുന്നതിനും ഷിഗെല്ല ബാക്ടീരിയ ബാധയ്ക്കെതിരെ ശക്തമായ പ്രതിരോധം തീർക്കുന്നതിനുമായി വളയംകുളം അസ്സബാഹ് ആർട്സ് ആൻഡ് സയൻസ് കോളേജിലെ ഫുഡ് ടെക്നോളജി ഡിപ്പാർട്മെന്റും, എൻ.എസ്.എസ് യൂണിറ്റും ആലങ്കോട് ഫാമിലി ഹെൽത്ത് സെന്ററും സംയുക്തമായി വിപുലമായ ബോധവൽക്കരണ ക്യാമ്പയിന് തുടക്കം കുറിച്ചു . 'സ്വയം സുരക്ഷിതരാവുക, സമൂഹത്തെ സംരക്ഷിക്കുക' എന്ന സന്ദേശമുയർത്തിക്കൊണ്ട് ജൂലൈ 7-ാം തീയതി കോളേജ് കാമ്പസിലാണ് പരിപാടി അരങ്ങേറിയത്.
അസ്സബാഹ് കോളേജ് പ്രിൻസിപ്പൽ പ്രൊഫ. മുഹമ്മദ് കോയ എം.എൻ ക്യാമ്പയിന്റെ ഔദ്യോഗിക ഉദ്ഘാടനം നിർവ്വഹിച്ചു. കോളേജ് നാഷണൽ സർവീസ് സ്കീം പ്രോഗ്രാം ഓഫീസർ അബ്ദുൽ റഹ്മാൻ പി ചടങ്ങിൽ സ്വാഗതം ആശംസിക്കുകയും ക്യാമ്പയിന്റെ ലക്ഷ്യങ്ങളെക്കുറിച്ച് വിശദീകരിക്കുകയും ചെയ്തു.
ക്യാമ്പയിന്റെ ഭാഗമായി ഫുഡ് ടെക്നോളജി ഡിപ്പാർട്മെന്റിലെ പി.ജി വിദ്യാർത്ഥികൾ പൊതുജനങ്ങൾക്കായി തയ്യാറാക്കിയ പ്രത്യേക ഷിഗെല്ല ബോധവൽക്കരണ വീഡിയോയുടെ പ്രകാശനം ആലങ്കോട് ഫാമിലി ഹെൽത്ത് സെന്ററിലെ ഹെൽത്ത് ഇൻസ്പെക്ടർ വേണുഗോപാലൻ നിർവ്വഹിച്ചു. ഡിജിറ്റൽ മാധ്യമങ്ങളിലൂടെ കൃത്യമായ വിവരങ്ങൾ ജനങ്ങളിലേക്ക് എത്തിക്കുന്നത് രോഗവ്യാപനം തടയാൻ ഏറെ സഹായകരമാകുമെന്ന് അദ്ദേഹം അഭിപ്രായപ്പെട്ടു.
തുടർന്ന് നടന്ന മുഖ്യ പ്രഭാഷണത്തിൽ ആലങ്കോട് എഫ്.എച്ച്.സിയിലെ ജൂനിയർ ഹെൽത്ത് ഇൻസ്പെക്ടർ ജിനി ജേക്കബ് സംസാരിച്ചു. ഷിഗെല്ല ബാക്ടീരിയയുടെ രോഗലക്ഷണങ്ങൾ, അത് പടരുന്ന രീതികൾ, സ്വീകരിക്കേണ്ട മുൻകരുതലുകൾ, വ്യക്തിശുചിത്വത്തിന്റെ പ്രാധാന്യം എന്നിവയെക്കുറിച്ച് വിദ്യാർത്ഥികൾക്കായി വിശദമായ ക്ലാസ്സ് അവർ കൈകാര്യം ചെയ്തു. മലിനമായ ജലത്തിലൂടെയും ആഹാരത്തിലൂടെയും പകരുന്ന ഈ രോഗത്തെ കൃത്യമായ പ്രതിരോധ ശീലങ്ങളിലൂടെ പൂർണ്ണമായും അകറ്റിനിർത്താൻ കഴിയുമെന്ന് അവർ ചൂണ്ടിക്കാട്ടി.
ചടങ്ങിൽ ജൂനിയർ ഹെൽത്ത് ഇൻസ്പെക്ടർമാരായ അരുൺ ടി.വി, രേഷ്മ എം.എ, അധ്യാപകരായ ശ്രീദേവി, ഷബ്ന എന്നിവർ സംബന്ധിക്കുകയും പ്രതിരോധ പ്രവർത്തനങ്ങളിൽ പങ്കാളികളാകാൻ വിദ്യാർത്ഥികൾക്ക് ആവശ്യമായ മാർഗ്ഗനിർദ്ദേശങ്ങൾ നൽകുകയും ചെയ്തു. പരിപാടിയുടെ സമാപനത്തിൽ കോളേജിലെ അഞ്ചാം സെമസ്റ്റർ ഫുഡ് ടെക്നോളജി വിദ്യാർത്ഥിനി ഫിദ ഉമ്മർ നന്ദി രേഖപ്പെടുത്തി. കോളേജിലെ അധ്യാപകരും ജീവനക്കാരും നിരവധി വിദ്യാർത്ഥികളും ബോധവൽക്കരണ ക്യാമ്പയിന്റെ ഭാഗമായി.
