കുന്നംകുളത്ത് തെങ്ങുകയറ്റം ചോദ്യം ചെയ്തതിന് യുവാവിന് നേരെ വധശ്രമം; രണ്ടുപേർ അറസ്റ്റിൽ

കുന്നംകുളം:കുന്നംകുളത്ത് തെങ്ങുകയറ്റം ചോദ്യം ചെയ്തതിന് യുവാവിന് നേരെ വധശ്രമം രണ്ടുപേർ അറസ്റ്റിൽ. പെരുമ്പിലാവ് ആൽത്തറ എസ്റ്റേറ്റ് പടി 27 വയസ്സുള്ള ചിന്നൻ, ആൽത്തറ സ്വദേശി നെല്ലിക്കൽ വീട്ടിൽ 29 വയസ്സുള്ള വിനീത് എന്ന അജിത്ത് എന്നിവരാണ് അറസ്റ്റിലായത്. ദേശമംഗലം ആറങ്ങോട്ടുകര സ്വദേശിയായ വീരമുത്തു എന്ന യുവാവിന് നേരെയാണ് പ്രതികളുടെ ഭാഗത്തുനിന്ന് ക്രൂരമായ ആക്രമണം ഉണ്ടായത്. വീരമുത്തുവിന്റെ ബന്ധുവിന്റെ മേൽനോട്ടത്തിലുള്ള പറമ്പിൽ അനുവാദം കൂടാതെ തെങ്ങുകയറാൻ എത്തിയവരാണ് ആക്രമണം നടത്തിയത്. സംഭവത്തെക്കുറിച്ച് ബന്ധു ചോദ്യം ചെയ്തപ്പോൾ അവരെയും മക്കളെയും പ്രതികൾ അസഭ്യം പറയുകയായിരുന്നു. ഇത് ചോദിക്കാൻ ചെന്നപ്പോഴാണ് യുവാവിനെ പ്രതികൾ തടഞ്ഞുനിർത്തി ആക്രമിച്ചത്.

ആഗസ്റ്റ് 20-ാം തീയതി വൈകിട്ട് ഏഴുമണിയോടെയായിരുന്നു സംഭവം നടന്നത്. ഒന്നാം പ്രതിയായ ചിന്നന്റെ വീടിന് സമീപത്തുള്ള വഴിയിൽ വെച്ച് പ്രതികൾ യുവാവിനെ തടഞ്ഞുനിർത്തി കൊലപ്പെടുത്തണമെന്ന ഉദ്ദേശത്തോടെ ആക്രമിക്കുകയായിരുന്നു. ഒന്നാം പ്രതി വീട്ടിൽ സൂക്ഷിച്ചിരുന്ന ഇരുമ്പ് ചുറ്റിക ഉപയോഗിച്ച് യുവാവിന്റെ തലയ്ക്കടിക്കുകയും, ഇയാളുടെ അളിയനും രണ്ടാം പ്രതിയുമായ വിനിൽ എന്ന അജിത്ത് മരവടി ഉപയോഗിച്ച് തലയ്ക്കടിച്ച് പരിക്കേൽപ്പിക്കുകയുമായിരുന്നു.

ആക്രമണത്തിൽ യുവാവിന്റെ തലയ്ക്ക് ഗുരുതരമായി പരിക്കേൽക്കുകയും പന്ത്രണ്ടോളം തുന്നലുകൾ ഇടേണ്ടി വരികയും ചെയ്തു. സംഭവത്തിൽ പരാതിയുടെ അടിസ്ഥാനത്തിൽ കുന്നംകുളം പോലീസ് കേസെടുത്ത് അന്വേഷണം ആരംഭിച്ചു. ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരം വധശ്രമത്തിനാണ് കേസ് രജിസ്റ്റർ ചെയ്തിരിക്കുന്നത്. എസ്.ഐ രോഹിത് കെ. യുടെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.