ഗുരുവായൂർ: വിശ്വപ്രസിദ്ധമായ ഗുരുവായൂർ ഏകാദശിയോടനുബന്ധിച്ച് ദേവസ്വം നടത്തുന്ന ചെമ്പൈ സംഗീതോൽസവത്തിന് മുന്നോടിയായുള്ള തംബുരു വിളംബര ഘോഷയാത്ര തുടങ്ങി.ഘോഷയാത്രയുടെ ഉദ്ഘാടനം ചെമ്പൈ സ്വാമികളുടെ ഭവനത്തിൽ നടന്ന ചടങ്ങിൽ പി.പി.സുമോദ് എം എൽ എ നിർവ്വഹിച്ചു. ചെമ്പൈ സ്വാമികൾ ഉപയോഗിച്ചിരുന്ന തംബുരു ഗുരുവായൂർ ദേവസ്വം ചെയർമാൻ എ.വി.ഗോപിനാഥ് ഏറ്റുവാങ്ങി. ചെമ്പൈയുടെ കുടുംബാംഗം ചെമ്പൈ സുരേഷിൽ നിന്നാണ് തംബുരു ഏറ്റുവാങ്ങിയത്. ചടങ്ങിൽ ദേവസ്വംഭരണസമിതി അംഗങ്ങളായ ബ്രഹ്മശ്രീ. മല്ലിശ്ശേരി പരമേശ്വരൻ നമ്പൂതിരിപ്പാട്, എം.യു. ഷിനിജ, ദേവസ്വം അഡ്‌മിനിസ്ട്രേറ്റർ എസ്.ഹരി ഗോപാൽ ,മലബാർ ദേവസ്വം ബോർഡ് പാലക്കാട് ഏരിയ പ്രസിഡന്റ് എം. ദണ്ഡപാണി മാസ്റ്റർ, ചെമ്പെ സംഗീതോത്സവ സബ്ബ് കമ്മിറ്റി അംഗങ്ങളായ വൈക്കം വേണുഗോപാൽ, തിരുവിഴ ശിവാനന്ദൻ,എൻ.ഹരി, ആനയടി പ്രസാദ്, ഡോ.ഗുരുവായൂർ മണികണ്ഠൻ, ചേപ്പാട് വാമനൻ നമ്പൂതിരി എന്നിവർ സന്നിഹിതരായി.
ഉദ്ഘാടന ചടങ്ങിന് മുന്നോടിയായി ചെമ്പൈയുടെ ശിഷ്യനും സംഗീതജ്ഞനുമായ മണ്ണൂർ രാജകുമാരനുണ്ണി സംഗീത കച്ചേരി നടത്തി.ചടങ്ങിൽ മുരുകൻ സ്വാഗതവും
ചെമ്പൈ സുരേഷ് നന്ദിയും പറഞ്ഞു. വെള്ളിയാഴ്ച രാവിലെ തംബുരു വിളംബര ഘോഷയാത്ര വിവിധ
കേന്ദ്രങ്ങളിലെ
സ്വീകരണം ഏറ്റുവാങ്ങി ഗുരുവായൂരിലേക്ക് തിരിക്കും. ചെമ്പൈ സംഗീത കോളേജിൽ എത്തുന്ന വിളംബര ഘോഷയാത്രയെ അധ്യാപകരും സംഗീത വിദ്യാർത്ഥികളും ചേർന്ന് സ്വീകരിക്കും തുടർന്ന് സംഗീത കച്ചേരി അരങ്ങേറും. ഉച്ചക്ക് 12 മണിയോടെ തംബുരു വിളംബര ഘോഷയാത്ര ചെമ്പൈ സ്വാമികൾ അവസാന കച്ചേരി നടത്തിയ ഒളപ്പമണ്ണ മന വക പൂഴിക്കുന്നം ശ്രീകൃഷ്ണ ക്ഷേത്രത്തിലെ സ്വീകരണം ഏറ്റുവാങ്ങും. ഒളപ്പമണ്ണ മനയുടെ ഇപ്പോഴത്തെ അവകാശി രാജൻ നമ്പൂതിരിപ്പാടിന്റെ നേതൃത്വത്തിലാണ് ഇവിടുത്തെ സ്വീകരണം. തുടർന്ന് ഉച്ച ഭക്ഷണത്തിനുശേഷം വിളംബര ഘോഷയാത്ര ഗുരുവായൂരിലേക്ക് യാത്ര തിരിക്കും.
വൈകുന്നേരം 5 മണിയോടെ കിഴക്കേനടയിൽ എത്തും.മഞ്ജുളാൽ പരിസരത്തു നിന്നും ഗജവീരൻമാരുടെ സാന്നിധ്യത്തിലും വാദ്യമേളങ്ങളോടെയും ദേവസ്വം ചെയർമാൻ എ.വി.ഗോപിനാഥിന്റെ നേതൃത്വത്തിൽ ദേവസ്വം ഭരണസമിതി അംഗങ്ങളും ഗുരുവായൂരിലെ വിവിധ സാമൂഹ്യസാംസ്ക‌ാരിക സംഘടനാ നേതാക്കളും ഭക്തജനങ്ങളും വൻ എതിരേൽപ്പ് നൽകി തംബുരു വിളംബര ഘോഷയാത്രയെ ആനയിച്ച് മേൽപത്തൂർ ആഡിറ്റോറിയത്തിലെ സംഗീത മണ്ഡപത്തിലെത്തിക്കും. തുടർന്ന് തംമ്പുരു സംഗീത മണ്ഡപത്തിൽ സ്ഥാപിക്കുന്നതോടെ സംഗീതോത്സവം ദേവസ്വം മന്ത്രി കെ.മുരളീധരൻ ഉദ്ഘാടനം ചെയ്യും.തുടർന്ന് പതിനഞ്ച് ദിനരാത്രങ്ങൾ സംഗീതാർച്ചനയാൽ ഗുരുപവനപുരി സംഗീതസാഗരമായി മാറും.
