പാലക്കാട് : കൊല്ലങ്കോട് ഊട്ടറ വാട്ടയാറില് പൂട്ടിക്കിടന്ന വീട്ടില് നിന്ന് 44.5 പവന് സ്വര്ണം കവര്ന്നു. 30 ഗ്രാം വെള്ളിയും കവര്ച്ച ചെയ്യപ്പെട്ടിട്ടുണ്ട്. എംഎൻ നരേഷ് കുമാറിന്റെ വീട്ടിലാണ് കവര്ച്ച നടന്നത് .കിടപ്പുമുറിയുടെ അലമാരയില് സൂക്ഷിച്ച സ്വര്ണമാണ് കവര്ന്നത് . പൂട്ടിയിട്ട വീടിന്റെ മുന്വാതില് തകര്ത്തായിരുന്നു മോഷണം. ഇന്നലെ വൈകിട്ടാണ് മോഷണ വിവരം അറിയുന്നത് . താനും കുടുംബവും ഗുരുവായൂര് ക്ഷേത്ര സന്ദര്ശനത്തിന് പോയ സമയത്തായിരുന്നു കവര്ച്ചയെന്ന് വീട്ടുടമ നരേഷ് പറഞ്ഞു.വീടിന്റെ മുന്വാതിലും മുറികള്ക്ക് അകത്തുള്ള അലമാരകളുടെ പൂട്ടുപൊളിച്ചതായി കണ്ടെത്തിയിട്ടുണ്ട്. കൊല്ലങ്കോട് പൊലീസ് അന്വേഷണം ആരംഭിച്ചു. പൊലീസ് നായയും വിരലടയാള വിദഗ്ധരും വീട്ടിലെത്തി പരിശോധന നടത്തി.
