കുട്ടികളുടെ സർവതോന്മുഖമായ പുരോഗതി ലക്ഷ്യമിട്ട് കുന്നംകുളം നഗരസഭ ഈ അധ്യയന വർഷത്തിൽ സമഗ്ര വിദ്യാഭ്യാസ പരിപാടി നടപ്പിലാക്കുന്നു. കല, കായികം, ശാസ്ത്രം, സാങ്കേതികവിദ്യ, വായന എന്നീ മേഖലകളെ ആസ്പദമാക്കിയാണ് വിവിധ പരിപാടികൾ ആസൂത്രണം ചെയ്തിരിക്കുന്നത്.
ഡിജിറ്റൽ യുഗത്തിൽ കുട്ടികളുടെ മാനസിക-ശാരീരിക ആരോഗ്യത്തെ പ്രതികൂലമായി ബാധിക്കുന്ന സാഹചര്യങ്ങൾ വർധിച്ചുവരുന്ന പശ്ചാത്തലത്തിലാണ് നഗരസഭയുടെ ഈ മാതൃകാപരമായ ഇടപെടൽ. പരിപാടിയുടെ ആദ്യ ചുവടുവെപ്പായി ആഗസ്റ്റ് 14-ന് രാവിലെ 10 മണിക്ക് കുന്നംകുളം ടൗൺ ഹാളിൽ അധ്യാപകർക്കും രക്ഷിതാക്കൾക്കുമായി പ്രത്യേക ശില്പശാല സംഘടിപ്പിക്കും. 'പുതിയ കാലഘട്ടത്തിൽ കുട്ടികളോട് മാതാപിതാക്കളുടെയും അധ്യാപകരുടെയും ഇടപെടൽ എങ്ങനെയാകണം' എന്ന വിഷയത്തിലാണ് ശില്പശാല. പ്രശസ്ത എഴുത്തുകാരൻ രാം മോഹൻ പാലിയത്ത് മുഖ്യാതിഥിയായി പങ്കെടുത്ത് ക്ലാസുകൾ നയിക്കും.
പരിപാടിയുടെ സുഗമമായ നടത്തിപ്പിനായി ചേർന്ന സംഘാടകസമിതി യോഗത്തിൽ ചെയർപേഴ്സൺ സൗമ്യ അനിലൻ അധ്യക്ഷത വഹിച്ചു.
