NEET-PG 2026 പരീക്ഷ ഓഗസ്റ്റ് 30-ന്. രാവിലെ 09:00 മണി മുതൽ ഉച്ചയ്ക്ക് 12:30 വരെയാണ് പരീക്ഷ. ഒറ്റ ഷിഫ്റ്റായി പരീക്ഷ നടത്തും. കമ്പ്യൂട്ടർ അധിഷ്ഠിത പരീക്ഷയായിരിക്കും. അഡ്മിറ്റ് കാർഡ് 25 ന് ലഭിക്കും. പുതുക്കിയ പരീക്ഷാ കലണ്ടർ അനുസരിച്ച് ഉദ്യോഗാർത്ഥികൾക്ക് ഔദ്യോഗിക വെബ്സൈറ്റായ nbe.edu.in വഴി അഡ്മിറ്റ് കാർഡുകൾ ഡൗൺലോഡ് ചെയ്യാം.
നേരത്തെ ഓഗസ്റ്റ് 24-ന് അഡ്മിറ്റ് കാർഡ് നൽകുമെന്നാണ് അറിയിച്ചിരുന്നതെങ്കിലും പിന്നീട് തീയതി ഓഗസ്റ്റ് 25-ലേക്ക് മാറ്റുകയായിരുന്നു. പരീക്ഷാ കേന്ദ്രത്തിന്റെ കൃത്യമായ വിവരങ്ങളും നിർദേശങ്ങളും അഡ്മിറ്റ് കാർഡിൽ അടങ്ങിയിരിക്കും. അഡ്മിറ്റ് കാർഡിലെ പേര്, ഫോട്ടോ, പരീക്ഷാ കേന്ദ്രം എന്നിവ ഡൗൺലോഡ് ചെയ്ത ഉടൻ ഉദ്യോഗാർത്ഥികൾ കൃത്യമായി പരിശോധിക്കേണ്ടതാണ്. എന്തെങ്കിലും തെറ്റുകൾ ശ്രദ്ധയിൽപ്പെട്ടാൽ ഉടൻ തന്നെ എൻബിഇഎംഎസ് അധികൃതരുമായി ബന്ധപ്പെടുക. വ്യാജ പ്രചാരണങ്ങളിലും സോഷ്യൽ മീഡിയ വാർത്തകളിലും വീഴരുതെന്നും ഔദ്യോഗിക വെബ്സൈറ്റിലെ വിവരങ്ങൾ മാത്രം പിന്തുടരണമെന്നും ബോർഡ് അറിയിച്ചു.
